بقلم: د. فادي أبو سلّ
خريج دفعة أدرينالين- الفوج الثالث
مرحبا
أنا فادي ابو سل ، وفي هذه الأيام أحتفل بتخرجي من كلية طب جامعة اليرموك والحمدلله كشاب سعيد وسليم ومعافى ومتفائل بمستقبل مشرق. لكن هذه الفرحة جاءت بعد خبرة خاصة صعبة تعرضت لها أثناء دراستي في كلية الطب. أود أن أسردها لكم ليعلم كل من تواجهه المصاعب خلال مشواره أن الإرادة والعزيمة والاجتهاد ومحبة الأهل والأصدقاء هي مفاتيح السعادة والنجاح.
حاب أشارككم تجربتي مع المرض الخبيث نعم المرض الخبيث الذي لا يحب المجتمع ذكر اسمه وهو السرطان .
القصة بلشت من لما خلية صغيرة بصدري قررت تكبر بسنة رابعة قبل الإنترودكتري كورس اللي هو مادة مقدمة الطب السريري. وبلشت تعملي أعراض بفترة الإمتحان وبعدها، وكبرت لحتى صارت كتله بحجم 13*9 سم وكانت في داخل الصدر mediastinum بوقتها بلشت معي الأعراض بتعرق شديد بالليل ، التعب كان موجود دائما، ضيق النفس ،وكان عندي تسارع بالنبض حتى وأنا قاعد ، وبفترتها برضه خسرت وزن .
كل هاي الأعراض كان مفروض أعرفها كمان شوي لما أداوم كلينيكال وأشوف حالات الcancer ، ويمكن بوقتها كنت رح أقدر أشخص حالي.
تشخصت بالمستشفى بعد ما قررت اني بدي أغيب عن الدوام فكان لازم أروح آخذ عذر عن الأعراض يلي عندي ويلي بالأساس كنت مفكرها pneumonia،بس كانت المفاجأه انو طلع كانسر-سرطان وبوقتها اخذت عذر فعلا بس كان عذر عن كل حياتي قبل الكانسر.
بعدها كنت بفترة صراع اسأل حالي انو ليه انا بالذات ؟ شو عملت أو مع مين غلطت ؟ شو عملت للناس؟ كان بدي أي اشي يجاوبني بس مشان الاقي السبب بس فعليا ما كان في جواب. واقتنعت انو كان اختبار من ربنا وحمدت ربي عليه وكنت جاهز.
كان أصعب اشي علي اني اخبر اهلي يلي اصلا مش عندي بالبلد واني احاول أكون قوي قدامهم واني ما أخوفهم وما اترك حدا يقلق علي ، بس انا بنفس الوقت خايف فكان موقف صعب انو أكون دكتور واكون ابنهم .
بعدت كثير عن الدوام وفي ناس كثير كانوا يحكولي انو اسقط الفصل والحالات يلي زيك ما قدروا يتحركوا بس كانوا اخر همي والحمدلله هيني بتخرج معكم .
دخلت مركز الحسين بيوم عيد ميلادي كحالة نادرة بال(mediastinal seminoma)
كنت رقم 155 بالعالم وبالحسين قرروا يعطوني 3cycles من ال chemo بعدها زادوها ل 4 ع مُدة خمس أشهر ،كانت اخر جرعة ب 9_2_2019 بلشتها بالجراحة ومريت بالأطفال لحد ما خلصت الجرعات بالباطني
كنت أداوم خفيف على قد ما كنت أقدر ،كان يومي يبلش بانو أطلع من عمان عاربد اداوم بالمستشفى بعدين أرجع عمركز الحسين اخد جرعة الchemo وبعدين اروح عبيتي اكل وانام .
كنت أحاول اسلي حالي بأي اشي وأختصر وقت الchemo يلي كان من 5 ل 6 ساعات منهم انو امسك سلايداتي وادرس بايد وحده لانه الايد الثانية كنت اخد فيها chemo .
مر الواحد بظروف شبه الموت ،استفراغ فوق ال 30 مرة بكم ساعه ، والنزيف يلي كان 24 ساعه حتى الأكل والمي ما كان طعمهم طبيعي كان زي الصدأ.
مرض الكانسر بحتاج أي دعم من أي حد حتى لو كان بسيط ،يلي فكر بيوم يحلق شعره عالصفر مشاني بعد ما نزل كل شعري زي يزن ووجود مهند وغرايبة والبوّ وصلاح وقتادة جنبي وحولي عايشين كل لحظة معي حتى لو برنة تلفون، كلهم كانوا أكبر دعم وأكبر نعمة بحتاجها الواحد .
ناس كثير ما قصرت معي جروبي والدكاترة يلي كانو معي ودعموني .
وأهم الناس أهلي يلي كانت كلمة وضحكة منهم تغيرلي كل يومي وتنسيني كل الوجع .
بعد كل يلي مريت فيه نظرتي للحياه تغيرت ،اقتنعت انو لازم أعيش الحياة ببساطه وأعيش كل لحظه فيها وأقدر أقل اشي فيها حتى لو لعبة شدة مع صحابي
لأنو الواحد ما بعرف متى فيوم ممكن تنقلب حياته 180 درجة ويصير يتحسر ع هالايام ويتمنى انو ما عمل مشاكل وعصب بهاليوم .
وتعلمت انو كل اشي بحياة الواحد خير شو ما كان حتى لو ما بتعرف ليه بوقتها لأنه لقدام شوي رح تعرف وشوي شوي منك لحالك رح تصير تضحك .
الله يبعد المرض عنكم وعن أحبائكم جميعا.❤"
فادي أبو سل - دفعة أدرينالين 2015-2021.